ဖောက်သည်ရဲ့ မကျေနပ်ချက်ကို ချီးမွမ်းစကားဖြစ်အောင် လုပ်တတ်ဖို့

“ဖောက်သည်တွေရဲ့ မကျေနပ်ချက်ကို ဖြေရှင်းပေးနိုင်တဲ့အခါ မကျေနပ်တဲ့ ဖောက်သည်(၁၀)ယောက်မှာ (၇)ယောက်လောက်က သင့်ဆီကို ပြန်လာလိမ့်မယ်။” လို့ စာရေးဆရာ Dr. Michael LeBoeuf က “ဖောက်သည်ဆွဲဆောင်နည်းနဲ့ ရာသက်ပန်ထိန်းသိမ်းထားနည်း” စာအုပ်ထဲမှာ ဖော်ပြထားတယ်။ သင့်အနေနဲ့ ဖောက်သည်ရဲ့ မကျေနပ်ချက်ကို ချက်ချင်းလက်ငင်းဖြေရှင်းပေးနိုင်ရင်တော့ ၉၅ ရာနှုန်းလောက်က သင့်ဆီကို ပြန်ရောက်လာကြမှာ ဖြစ်တယ်။ နောက်ပြီး ကျေနပ်သွားတဲ့ ဖောက်သည်ဟာ သင့်ဝန်ဆောင်မှုနဲ့ပတ်သက်ပြီး သူ ဘယ်လောက်ကျေနပ်ကြောင်း နောက်ထပ်လူ(၅)ယောက်လောက်ကို ပြောပြဦးမှာ ဖြစ်ပါတယ်။

ဒါပေမယ့် စားသုံးသူရဲ့ တိုင်တန်းချက်ကို အရေးတယူနဲ့ ဖြေရှင်းမပေးဘူးဆိုရင်တော့ သင့်အနေနဲ့ အဲဒီဖောက်သည်ကို ဆုံးရှုံးရုံမက သူကနေ နောက်ထပ်လူ (၈) ယောက်၊ (၉) ယောက်၊ (၁၀) ယောက်လောက်ကို လိုက်ပြောနေတဲ့အတွက် ဖောက်သည်အသစ်တွေကိုပါ ထပ်ပြီး ဆုံးရှုံးရဦးမှာ ဖြစ်ပါတယ်။ ဒါ့ကြောင့် ဖောက်သည်ကို ဆက်ဆံတဲ့အခါ မှန်မှန်ကန်ကန်ဆက်ဆံဖို့ လိုပြီး ဖောက်သည်က မကျေနပ်ချက်ကို တိုင်တန်းတဲ့အခါမှာလည်း လျင်လျင်မြန်မြန်၊ ယဉ်ယဉ်ကျေးကျေးနဲ့ ဖြေရှင်းပေးတတ်ဖို့ လိုပါတယ်။

ဖောက်သည်တစ်ယောက်ယောက်က တိုင်တာတောတာတွေ လာလုပ်နေပြီဆိုတာနဲ့ သင်သိထားရမှာက သင့်လုပ်ငန်းဟာ သူတို့မျှော်လင့်ထားတဲ့ ဝန်ဆောင်မှုကို မပေးလို့ သူတိုင်တန်းတာ ဖြစ်တယ် ဆိုတာကိုပါပဲ။ ဝန်ဆောင်မှုကို ဖောက်သည်မျှော်လင့်ထားသလို သင်က သင်က မပေးတဲ့အခါ သင့်ပြိုင်ဖက်တွေဆီကို သင့်ထက်ကောင်းတဲ့ ဝန်ဆောင်မှုပေးနိုင်ဖို့ အခွင့်အရေးပေးလိုက်သလို ဖြစ်သွားပါတယ်။ ဒါကြောင့် ဖောက်သည်ပြောတာကို ဂရုတစိုက်နားထောင်ပြီး ပြုပြင်ရမယ့်နေရာတွေကို ပြုပြင်ဖို့ ဝန်မလေးပါနဲ့။

တကယ်တော့ သင့်ကို တိုင်တန်းတယ်ဆိုတာ သင့်မှာ ပြုပြင်စရာရှိတာတွေကို ပြုပြင်ဖို့ ဖောက်သည်က ဒုတိယအကြိမ်မြောက်အခွင့်အရေးပေးနေတာ ဖြစ်ပါတယ်။ ဒါ့အပြင် သူတို့ပြောတဲ့အတိုင်းသာ ပြုပြင်ပေးနိုင်မယ်ဆိုရင် သင်ဟာ ပုံမှန်ဖောက်သည်တွေရရှိလာရုံသာမက အခြားပြိုင်ဖက်တွေဆီ ရောက်မသွားအောင်လည်း တားဆီးနိုင်ပါတယ်။

မကျေနပ်ချက်တစ်ခုခုရှိနေတဲ့ စားသုံးသူတစ်ယောက်ယောက်နဲ့ ဆက်သွယ်ရပြီဆိုတာနဲ့ ပြုမူသင့်တဲ့ အချက်အလက်တွေကို အောက်ပါအတိုင်း မျှဝေလိုပါတယ် –

• ဖောက်သည်ပြောတာကို သေသေချာချာနားစိုက်ထောင်ပါ။ ဒီလို ဂရုတစိုက်နားထောင်ခြင်းအားဖြင့် သူတို့ရဲ့ ဒေါသ လျော့ပါးသွားအောင် လုပ်နိုင်တယ်။ သင့်အနေနဲ့ သူတို့အခက်အခဲကို ဘယ်လောက် အလေးအနက်ထားတယ်ဆိုတာကိုလည်း သူတို့ သိအောင်လုပ်နိုင်တယ်။
• သူတို့ပြောတာကို ပြန်ပြန်ပြီး နောက်ကနေ အတည်ပြုပေးပါ။ “အစ်ကိုကြီး/အစ်မကြီး ပြောတာကို ကျွန်တော်/ကျွန်မတို့ ကျကျနန သဘောပေါက်-မပေါက် သေချာအောင် စစ်ကြည့်ပါရစေ။ လူကြီးမင်း ဖြစ်စေချင်တာ ဒီလိုမဟုတ်လားခင်ဗျာ/ရှင်။ ကျွန်တော်/ကျွန်မတို့က ဒါတွေလုပ်ပေးရမှာ မဟုတ်လား/ရှင်။” ဆိုတဲ့ စကားမျိုးနဲ့ စားသုံးသူပြောတာကို ပြန်အတည်ပြုပါ။
• စားသုံးသူ ဘာလိုချင်လဲဆိုတာ သေချာသိအောင်လုပ်ပါ။ ဥပမာ – ငွေပြန်အမ်းစေချင်တာ၊ ဈေးလျှော့စေချင်တာ စသည်ဖြင့်။
• သင့်တင်လျောက်ပတ်တဲ့ ဖြေရှင်းချက် တစ်ခုကို ပြောပြပါ။ စားသုံးသူအနေနဲ့ ဒီအတိုင်းဖြေရှင်းဖို့ သဘောတူ-မတူ မေးပါ။ “ဒီပစ္စည်းကို ပြန်ယူလိုက်ပါ့မယ်။ ပေးစရာရှိတာလည်း နောက်မှ ပေးပါ။ ဒီလိုဆို အဆင်ပြေမလား ခင်ဗျာ/ရှင်။” စသည်ဖြင့် ပေါ့။
• သင်ပြောတဲ့ ဖြေရှင်းချက်ကို စားသုံးသူက မကြိုက်ရင် ဘယ်လိုဖြေရှင်းပေးစေချင်သလဲဆိုတာ သူတို့ကို မေးပါ။
• ဖြစ်နိုင်ရင် ပြဿနာဖြစ်တာနဲ့ ချက်ချင်းလက်ငင်းဖြေရှင်းပေးပါ။
• သင့်လျော်တဲ့အချိန်အခါမျိုးမှာ မကျေနပ်ခဲ့တဲ့ ဖောက်သည်ကို ဖုန်းဆက်ပြီး အဆင်ပြေ-မပြေ မေးမြန်းပါ။
• စားသုံးသူ မျက်နှာပျက်၊ အရှက်ရစေမယ့် အပြောအဆို၊ အပြုအမူတွေကို ရှောင်ကြဉ်ပါ။

ဒီလိုကောင်းကောင်းမွန်မွန်ဖြေရှင်းပေးပေမယ့် သင့်အပေါ်မှာ အမြတ်ထုတ်ချင်တဲ့ စားသုံးသူတွေကတော့ တစ်ကြိမ်မဟုတ် တစ်ကြိမ်မှာ တွေ့နေရဦးမှာ ဖြစ်ပါတယ်။ ဒါပေမယ့် ဒီလိုစားသုံးသူမျိုးဟာ နည်းနည်းပါးပါးပဲ ရှိပါတယ်။ အောက်ကျခံစရာရှိတာ ခံလိုက်ပါ။ စားသုံးသူအများစုကြီးကတော့ သင့်အပေါ် ကျေနပ်နေကြမှာ သေချာပါတယ်။ အကျိုးရလဒ်အနေနဲ့ သင့်ဆိုင်မှာ သစ္စာရှိရှိနဲ့ လာဝယ်ယူမယ့် ဖောက်သည်တွေကို သင်ထိန်းထားနိုင်မှာ ဖြစ်ပြီး သူတို့က ညွှန်းပေးလိုက်လို့ ထပ်ရောက်လာမယ့် ဖောက်သည်တွေလည်း တိုးပွားလာမှာ ဖြစ်ပါတယ်။

အလားတူ တိုင်တန်းချက်တွေ နောင်မှာ ပေါ်လာရင်လည်း အောက်က မားကတ်တင်းလုပ်ငန်းစဉ်ကို သုံးပြီး ဖြေရှင်းနိုင်ပါတယ် –

1. စားသုံးသူရဲ့ တိုင်တန်းချက်ကို အတတ်နိုင်ဆုံး ချက်ချင်းလက်ငင်းဖြေရှင်းပေးဖို့ မူဝါဒတစ်ရပ်ကို ဖန်တီးပါ။
2. တိုင်တန်းချက်တွေ ဖြစ်လာရင် ဖြေရှင်းပေးနိုင်တဲ့ အခွင့်အာဏာကိုလည်း ဝန်ထမ်းတွေကို ပေးထားပါ။ (ဥပမာ – ပြန်လဲတာကို လက်ခံနိုင်ခွင့်၊ ငွေပြန်အမ်းပေးနိုင်ခွင့်၊ အလကားပေးနိုင်ခွင့် စသည်ဖြင့်)
3. သင့်လုပ်ငန်းက ဖြေရှင်းပေးလိုက်သမျှကို စားသုံးသူက ကျေကျေနပ်နပ်လက်ခံပါစေ။
4. စားသုံးသူလက်မခံနိုင်တဲ့ ဖြေရှင်းချက်တွေရှိရင် သူတို့လိုချင်တာကို ပြောပြခိုင်းပါ။ အဲဒီတောင်းဆိုချက်ကို အခြေခံပြီး ညှိစရာရှိတာ ညှိယူပါ။
5. အရေးအကြီးဆုံးကတော့ စားသုံးသူ အမြဲမှန်တယ် ဆိုတာထက် “စားသုံးသူက အချိန်တိုင်းမှာ စားသုံးသူ ဖြစ်နေမှာပဲ” ဆိုတာကို စွဲစွဲမြဲမြဲနှလုံးသွင်းထားပါ။ 

BusyBook