မြန်မာအမျိုးသမီးတွေရဲ့ အသံကို ထင်ဟပ်စေခဲ့သော အမျိုးသမီး ချန်ပီယံ "မကြည်အောင်"

မြန်မာအမျိုးသမီးတွေရဲ့ အသံကို ထင်ဟပ်စေခဲ့သော အမျိုးသမီး ချန်ပီယံ "မကြည်အောင်

တိမ်ပြာမိလ္လာရီ တပေါင်းလအမီ လေညင်းသွေးလို့ မွှေးတော့သည် စတဲ့ ရာသီတော်ဦး သီချင်းကို ကြားသူ တိုင်း မကြည်အောင်ရဲ့ အသံဝါကြီးကို သတိထားမိကြ ပါလိမ့်မယ်။

ဆရာမကိုပဲ အသည်းစွဲအောင် ချစ်တော့မည် သီချင်း ဟာ မကြည်အောင်ရဲ့ ရာသီတော်ဦးက အသံကို ယူပြီး ရာသီတော်ဦး ကတော့ Get Out and Get Under the Moon က ယူတာပါ။

အမျိုးသမီးထဲမှာ ရှားတဲ့ ဘယ်သံနဲ့ ဆိုနိုင်တဲ့အဆိုတော် မကြည်အောင်ကို လွန်ခဲ့တဲ့ နှစ် ၁၂ဝ က မွေးဖွားခဲ့ပြီး ၁၉၅ဝ ကျော်မှာ ကွယ်လွန်သွား ပါပြီ။

ဒါပေမဲ့ သူ့သီချင်းတွေကို အင်တာနက်မှာ ရှာဖွေပြီး မြန်မာတေးချစ်သူတွေ ပြန်လည် နားဆင်နိုင်ကြ ပါတယ်။

ရန်ကုန် ပုဇွန်တောင်ရပ်က မကြည်အောင်ဟာ အငြိမ့် မင်းသမီး ဘဝကနေ ဓာတ်ပြားသွင်းပြီး အဆိုတော် ဖြစ် လာခဲ့ပါတယ်။

ကိုလေအိုး ဓာတ်ပြားနဲ့ သူ နာမည်ကျော်သွားခဲ့ပြီး နှစ်ပေါင်း ၂ဝ ကျော်အောင် သီဆိုသွားခဲ့ပါတယ်။

အစောပိုင်း သီချင်းတွေမှာ အချစ်သီချင်းပုံစံ ဟာသ စာသားတွေနဲ့ စပ်ဆိုတာကြောင့် လူတွေကြားမှာ ဆိုလွယ် သီချင်းတွေအဖြစ် ပေါက်သွားခဲ့ပါတယ်။

ကိုဘီအေ အုပ်ပေါင်း ပေါင်းလို့ တုတ်တချောင်းနဲ့ လမ်းကို လျှောက်တယ်၊ ခေါင်းပေါင်းစ ရှည်လွန်း ရှည်လွန်းတယ်၊ဟိုက်စကူးကျောင်း ကျောင်းသား ရယ်၊ ကောလိပ်ကျောင်း ကျောင်းသားရယ် စတဲ့ ကိုလေအိုး သီချင်းကို စစ်ကြီးမဖြစ်ခင်က မြန်မာပြည်မှာ ပညာတတ်တွေ လူကြိုက်များတဲ့ အကြောင်း ဖော်ပြတဲ့ သီချင်းလို့ ယူဆကြပါတယ်။

ဒီသီချင်း အပါအဝင် သူ့ရဲ့ တေးသီချင်း အတော်များများ ကို ၁၉၆ဝ၊၇ဝ ကနေ ၂ဝဝဝ ပြည့်နှစ်တွေအထိပြန်လည် သီဆိုခဲ့ကြလို့ မကြည်အောင် နာမည်ဟာ ခုထိ ကျန်နေ ပါသေးတယ်။

သူ့အရင်က ပေါ်ခဲ့တဲ့ အဆိုတော် အများစုဟာ အငြိမ့် သီချင်း၊ ဇာတ်သီချင်းတွေကို အားပြုဆိုရပြီး သူတို့ဆိုဖို့ ဓာတ်ပြားသီချင်း သီးသန့် မရှိခဲ့ဘူးလို့ သိရပါတယ်။

သီချင်းရှားပါးမှုကြောင့် အမျိုးသား အဆိုတော်တွေ အမျိုးသမီး သီချင်းတွေ ဝင်ဆိုခဲ့ရတယ်လို့လည်း ဆိုပါတယ်။

မကြည်အောင်တို့ ခေတ်က စပြီး စန္ဒရားနဲ့ သီဆိုနိုင်တဲ့ အနောက်တိုင်းပုံစံနဲ့ မြန်မာသံရောတဲ့ တေးတွေ ခေတ်စား လာပါတယ်။

ဟောင်းအိုးမကြည်အောင်၊ ဝှပ်ဆိုတာဘာလဲ၊အိုင်ဆေး၊ ပလီတာ၊တီးပါတီ စတဲ့ တေးတွေဟာ အင်္ဂလိပ်နာမည် ကို ယူတာသာမကဘဲ တေးသွားကိုပါ ယူတာတွေ လည်း ရှိပါတယ်။

ဗီတာမို ကိုကိုးနဲ့ အမျိုးစုံညီ၊ ဟမ်ပတီ ဖရင့်ရိုးနဲ့ ဂိုးလ်ကော်ဖီ ကိုလံဘီယာအဖွဲ့နဲ့ ဧည့်ခံမည်၊ အဆော့တစ်ကိတ် ဂိုးဖလိပ်လည်း ကျွန်မဝယ်မည် စတဲ့ တီးပါတီ သီချင်းဟာ ကပ္ပရီကျွန်း သီချင်းကို မှီးတယ် ဆိုပေမယ့်ဗြိတိသျှခေတ်မှာ အနောက်တိုင်း 

လူနေမှုစနစ် ဝင်လာတာကိုဖော်ပြတဲ့ တေးတပုဒ် အဖြစ် ယူဆကြပါတယ်။

နောက်ပြီး သူ့တေးတွေမှာ အိန္ဒိယတေးသံတွေလွှမ်းမိုးမှု ရှိတယ်လို့လည်း ဆိုပါတယ်။

တာရာ ယုဂန်နန်းက ကြယ်အပေါင်းရယ် ထာဝစဉ် ထွန်းလင်းလို့ထိန်ကြည်တယ် စတဲ့ သားရွှေခဲ သီချင်း ဟာ ဒီအဆိုကို ထောက်ခံသလို ရှိပါတယ်။

သူနဲ့ခေတ်ပြိုင် အမျိုးသားအဆိုတော်တွေထဲက သူ့ထက် နောက်ကျတဲ့ ဥသြဘသောင်၊ ခင်မောင်ရင်၊ ပြည်လှဖေ စတဲ့သူတွေကိုသာ နှောင်းခေတ် လူတွေက သိကြပါတော့တယ်။

မကြည်အောင်ရဲ့ နာမည်ကြီးခဲ့တဲ့ တေးတွေကတော့ ဒီအဆိုတော်တွေရဲ့တေးတွေနဲ့ ယှဉ်ရင် သူကတောင် ပိုမိုများပြား စုံလင်နိုင်ပါတယ်။

ဒါကြောင့် သူ့ကို မြန်မာပြည်ရဲ့အစောဆုံး ခေတ်ပေါ် အဆိုတော် တယောက်လို့ သတ်မှတ်ခဲ့ကြပါတယ်။

သူ့သီဆိုပုံနဲ့ အသံကောင်းမှုမှာ စစ်ပြီးခေတ် အဆိုတော်တွေ လို ပါးနပ်ချိုသာမှု နည်းပေမယ့် အသံ သြဇာကောင်းမှုနဲ့ မြူးကြွမှု၊ စိတ်ခံစားချက်ကို ဖော်ပြနိုင် မှုတွေမှာ သူ့တေးတွေကလည်း မညံ့ဘူး လို့ ဆိုနိုင် ပါတယ်။

အထူးသဖြင့် သူ့ရဲ့မိဘမေတ္တာဘွဲ့တေးတွေနဲ့ ဘာသာရေးတေးတွေ၊ မျိုးချစ်စိတ်ကို နှိုးဆော်တဲ့ တေးတွေ ဟာ တခြားခေတ်ပြိုင်တွေ ဆိုတာထက် ပိုပြီး လူကြိုက်များသလို တင်ကျန်ခဲ့တာကို တွေ့ရ ပါတယ်။

မကြည်အောင်ရဲ့ တေးတွေဟာ ခေတ်ကို ထင်ဟပ် ပြီး ခေတ်စားတဲ့ အကြောင်းတွေကို စပ်ဆိုတာလည်း ရှိပါတယ်။

ဘာလင်မြို့ကို ကြည်အောင်သွားကာ ချန်ပီယံဘွဲ့ ယူမယ် စတဲ့ကမ္ဘာတလွှား သီချင်းနဲ့ ၁၉၃၆ က မြန်မာ ပြည်က ဦးဇော်ဝိတ် ဂျာမနီကို အိုလံပစ် သွားပြိုင်တဲ့ အကြောင်းကို မကြည်အောင်က ဂုဏ်တင် ပေးခဲ့ ပါတယ်။

သမဝါယမ အသင်းတွေကို အားပေးဖို့လည်း သူ သီဆိုခဲ့ သလိုလေယာဉ်ပျံ၊ မိန်းမဂျော်ကီ စတဲ့ တေးတွေကို လည်း ဆိုပါတယ်။

၁၉၃ဝ နောက်ပိုင်း မြန်မာပြည်မှာ နိုင်ငံရေး အတက်ကြွ ဆုံး အချိန်တခု ရောက်လာချိန်မှာ ကိုလံဘီယာ  ဓါတ်ပြားတိုက်ကနေ ရွှေတိုင်ညွန့် စပ်တဲ့ မကြည်အောင် ရဲ့ သီချင်းတွေ ထွက်လာ ပါတယ်။

ဒီတေးတွေဟာ မြန်မာပြည်ကို မျိုးချစ်တွေအမြင်မှာ ပုံဖော်တာကို ခေတ်ပေါ်တီးလုံးဆန်းတွေနဲ့ ရေးစပ်ထား လို့ ဆိုလို့ကောင်းပြီး အမျိုးသားရေး တက်ကြွဖွယ် တေးတွေအဖြစ် တဟုန်ထိုး နာမည်ကြီးခဲ့ ပါတယ်။

ဒီထဲက  သီတာရတနာ၊ အိုးဝေဝေ၊ ဗမာ့သွေးနဲ့  သုံးရောင်ခြယ်စတဲ့ တေးတွေ ပါပါတယ်။

နေတနှုန်းပမာ ဘုန်းသမ္ဘာ ကြီးမြတ်ကြတော့သည်၊ ဇာတိသွေးကို မွေးကာ အားပေးကြသင့်သည် စတဲ့ ဗမာ့သွေး သီချင်းဟာ ကနေ့ထက်ထိ မတိမ်ကောသေး တဲ့ မြန်မာ မျိုးချစ်စိတ် လှုံ့ဆော်တဲ့တေးတွေထဲမှာ ပါနေ ပါတယ်။

ဒုတိယ ကမ္ဘာစစ်ကြီးနဲ့အတူ ပေါ်ပေါက်လာတော့မယ့် ဗမာ့ လွတ်လပ်ရေး တပ်မတော် အတွက် ဒီလိုတေးတွေ ကနေ စစ်သား စုဆောင်းပေးခဲ့ပါတယ်။

ရွှေတိုင်ညွန့်စပ်ဆိုခဲ့တဲ့အထဲက ဝိစိတြ နဲ့ မိဘမေတ္တာ

တေးတွေဟာ မကြည်အောင်ရဲ့ အအောင်မြင်ဆုံး သီချင်းတွေ ထဲမှာ ပါပါတယ်။

ဗောဓိပင်နှင့် ရွှေပလ္လင်၊ နီးအောင်ပင်လှမ်း ၊ သာသနာ့ အမွေခံ၊ပဉ္စင်းအမ စတဲ့ တေးတွေကတော့အခုထိ အလှူမင်္ဂလာတွေနဲ့ ဘာသာရေး အခမ်းအနားတွေမှာ ဖွင့်နေဆဲ တေးတွေ ဖြစ်ပါတယ်။

ဗြဟ္မာနတ်လူအပေါ် ဒေသနာကြားလိုက်သော်၊ ကမ္ဘာ လောကမြေပြင်ပေါ် သုံးကြိမ်တိုင်အောင် အင်မတန် သာဓုခေါ် စတဲ့ ဓမ္မစကြာတေးကို ဝါဆိုချိန်မှာ နှစ်စဉ် နားဆင်ရမှာဖြစ်သလို ကြားရတိုင်း ဗုဒ္ဓဘာသာဝင်တွေ ရဲ့ စိတ်ကို ညွတ်နူးလာအောင် စည်းရုံးနိုင်တဲ့ အသံ သြဇာ မကြည်အောင်မှာ ရှိပါတယ်။

သပြေခက်နဲ့ ရေပက် သီချင်းမှာတော့ ငွေဖလားကြီး နဲ့ ရေကစားကြတာ အလွန်ကြမ်းကြောင်းကနေ စပြီး ရှေးခေတ်က သင်္ကြန် ယဉ်ကျေးပုံကို တမ်းတမိအောင် သီဆိုပြီး အတိတ်နဲ့ စပ်တဲ့အမျိုးသားရေးကို ပေါ်အောင် မကြည်အောင် သီဆိုခဲ့ပါတယ်။

သြော် လွမ်းတတ်ပါတော့သည် ရာသီကထန် ချိန်တော်ရုံ မှန်းပါလို့ တိတ်လိုက်စမ်းပါအတည် စတဲ့ 

မိုးပစ္စုန်မှာတော့ မိုးနဲ့ အလွမ်းကို သိမ်မွေ့အောင် ဖွဲ့ခဲ့တာ မို့ မလှရွှေဆိုတဲ့ မိုးဒေဝါနဲ့ အပြိုင် ထင်ရှားခဲ့ပါတယ်။

မူရင်းရေးသားသူ_ဘိုဘို