သစ္စာရှိရှိ အားပေးမယ့် ဖောက်သည်ဆိုတာ

စားသုံးသူတယောက်ကို ရွှေဥ ဥပေးတဲ့ ငန်းတကောင်လို့ မြင်ကြည့်လိုက်ပါ။ တသက်လုံး ထမင်းကျွေးသွားမယ့် ကျေးဇူးရှင်လို့ တွေးကြည့်လိုက်ပါ။

ဒီလို တသက်တာ ရွေဥတွေ ပေးမယ့် ငန်းတွေ ကိုယ့်ဆီမှာ ရောက်လာအောင် ဆွဲဆောင်ဖို့ ကိုယ့်ဘက်က ဘာလုပ်ရမလဲ။ တသက်လုံး သူကိုယ့်ဆီကပဲ အားပေးမယ်ဆိုရင် ကိုယ့်ဘက်က ဘယ်လောက်ထိ အကျိုးအမြတ်ရနိုင်မလဲ စတာတွေကို တွက်ချက်တဲ့ နည်းစနစ်နဲ့ပတ်သက်ပြီး ဆွေးနွေးသွားချင်ပါတယ်။

ကိုယ့်ဆီကနေပဲ သစ္စာရှိရှိနဲ့ တသက်လုံးဝယ်ယူအားပေးသွားမယ့် ဖောက်သည်တယောက်ရဲ့ တန်ဖိုးကို Lifetime Customer Value လို့ခေါ်ပါတယ်။ ဒီလို ဖောက်သည်တယောက်ကို ရဖို့ ကိုယ့်ဘက်က အရင်ဆုံးစိုက်ထုတ်ကုန်ကျရမယ့် မားကတ်ကင်းကုန်ကျစရိတ်ကို New Customer Acquisition Cost လို့ခေါ်ပါတယ်။ သူ့ဆီကနေ တသက်လုံးစာ ရရှိလာမယ့် ရောင်းရငွေစုစုပေါင်းကို lifetime revenue generated by a new customer လို့ ခေါ်ပါတယ်။

လုပ်ငန်းငယ်တခုအနေနဲ့ ‘ဘယ်သူတွေကို ဒစ်စကောင့်ပေးသင့်သလဲ’ ‘ငွေဘယ်လောက်အကုန်ခံပြီး ကြော်ငြာတွေထည့်ရမလဲ’ စတဲ့ ကုန်ကျစရိတ်တွေကို တွက်ချက်တဲ့အခါ သင် ဘယ်လောက်သုံးရင် တသက်တာဖောက်သည် ဘယ်နှယောက်ရလာနိုင်မလဲ၊ သူတို့ဆီက တသက်လုံးစာ ဘယ်လောက်ပြန်ရမှာလဲ ဆိုတဲ့ ခန့်မှန်းဝင်ငွေတွေကိုပါ ထည့်သွင်းပြီး တွက်ချက်ချိန်ဆရမှာ ဖြစ်ပါတယ်။

စားသုံးသူသစ်ရဖို့ ကုန်ကျစရိတ်

စားသုံးသူအသစ်တယောက်ရလာဖို့ သင့်ဘက်က ကုန်ကျရမယ့် စရိတ် (acquisition cost)ကိုပဲ တွက်ကြည့်ကြရအောင်။ ကာလတစ်ခုမှာ ကိုယ်သုံးစွဲခဲ့ဖူးတဲ့ မားကတ်တင်းကုန်ကျစရိတ်ကို ပြန်ချရေးကြည့်ပါ။ အဲဒီကာလအတွင်း (တနှစ်ဆိုပါစို့) မှာ ကိုယ်ဖောက်သည်အသစ်ဘယ်နှယောက်ရခဲ့သလဲ ချရေးပါ။ ကိုယ်က မားကတ်တင်းစရိတ် တသိန်းကျပ်သုံးလိုက်လို့ ဖောက်သည်ဆယ်ယောက်ရခဲ့ရင် ဖောက်သည်တယောက်ရဖို့ သင်ကုန်ကျခဲ့တဲ့စရိတ်ဟာ တသောင်းကျပ် ဖြစ်ပါတယ်။ မားကတ်တင်းကုန်ကျစရိတ်စုစုပေါင်းကို ရလာတဲ့ ဖောက်သည်အရေအတွက်နဲ့ စားလိုက်တာပါ။

ဒီလိုအလွယ်တွက်လိုက်တဲ့အခါ တိတိကျကျအဖြေကိုတော့ မရနိုင်ပေမယ့် နောင်မှာ တယောက်ချင်းအတွက် သုံးရမယ့်စရိတ်ကို အကြမ်းဖျင်းတော့ တွက်ကြည့်လို့ရသွားပါလိမ့်မယ်။ ဒီလိုတွက်ကြည့်တာမျိုးအပြင် ကိုယ့်ဆီကို ဖောက်သည်သစ်တွေ “ဘာကြောင့်” ရောက်လာရသလဲဆိုတာ တိတိကျကျသိချင်ရင်တော့ သူတို့ကို မေးကြည့်ဖို့လိုပါလိမ့်မယ်။ သူများက ညွှန်းလိုက်လို့ ရောက်လာတာလား၊ ဘာ့ကြောင့် လာဝယ်ချင်စိတ်ပေါက်လာသလဲ၊ ဘယ်နေသိလာတာလဲ စတာတွေကို မေးမြန်းပြီး မှတ်သားထားရပါမယ်။ ဒါမှနောင်တချိန် ကိုယ့်မားကတ်တင်းအသုံးစရိတ်ဟာ ဖောက်သည်ဘယ်နှယောက်လောက်အထိ တိုးပွားလာနိုင်သလဲဆိုတာ တိတိကျကျခန့်မှန်းကြည့်ဖို့ အချက်အလက်တွေရလာမှာ ဖြစ်ပါတယ်။

ဖောက်သည်သစ်ရဖို့ သင်သုံးရမယ့် မားကတ်တင်း ကုန်ကျရမယ့်စရိတ်တွေထဲမှာ ဆိုရှယ်မီဒီယာ၊ ဝက်ဘ်ဆိုက် စတာတွေကနေ ကြော်ငြာရတဲ့ ကုန်ကျစရိတ် စတာတွေအပြင် ကုန်ပစ္စည်းကို စစချင်း အသုံးပြုတဲ့ ဖောက်သည်ကို လျှော့ဈေး(ဒစ်စကောင့်)တွေ ပေးရတဲ့ စရိတ်တွေလည်းပါဝင်ပါတယ်။ Grab တက္ကစီကို စစီးတဲ့အခါ ပထမဦးဆုံး ၂ ခေါက် ၃ ခေါက်ကို ၁၅၀၀ ကျပ် ဈေးလျှော့ပေးတာမျိုး၊ အွန်လိုင်းစားစရာပို့ဆောင်ရေးကနေ မှာစားတဲ့အခါ ပို့ဆောင်ခလုံးဝမယူတာမျိုး၊ ရာခိုင်နှုန်းအတော်များများ လျှော့ပေးတာမျိုး စတာတွေ ပါဝင်ပါတယ်။

သစ္စာရှိတဲ့ စားသုံးသူဆီကနေ ရလာမယ့် အကျိုးအမြတ်

သင်က အွန်လိုင်းကနေ စားစရာရောင်းတယ်ဆိုပါစို့။ သစ္စာရှိတဲ့ စားသုံးသူတယောက်ဟာ အကြမ်းဖျင်းအားဖြင့် တလကို နှစ်ခါလောက် သင်ရောင်းချတဲ့ စားသောက်ဖွယ်ရာကို မှာပြီး စားတယ်ဆိုပါစို့။ နောက်ထပ်(၃)နှစ်လောက်မှာ ဒီလိုဖောက်သည်တယောက်ဆီက ရလာမယ့် အကျိုးအမြတ်ကို အောက်ပါအတိုင်း တွက်ကြည့်လို့ရပါတယ်။

သုံးနှစ်မှာ ဖောက်သည်ဝယ်ယူအားပေးမယ့် ဟင်းပွဲပေါင်း                  

• ၂ ပွဲ × ၁၂ လ × ၃ နှစ် = ၇၂ ပွဲ

ဟင်းတပွဲကို ၅၀၀၀ ပဲထား၊ စုစုပေါင်းဟင်းပွဲတန်ဖိုး                          

• ၇၂ ပွဲ × ၅၀၀၀ ကျပ် = ၃၆၀,၀၀၀ ကျပ်

သင်ယူတဲ့ အမြတ်ရာခိုင်နှုန်း                                                         

• ၄၀%

သစ္စာရှိတဲ့ ဖောက်သည်ဆီက အသားတင်ကျန်မယ့်အကျိုးအမြတ်       

• ၁၄၄,၀၀၀ ကျပ်

ဒီလိုတွက်ချက်ပုံဟာ အစအဆုံး ခန့်မှန်းခြေသက်သက်ပဲဖြစ်တယ်ဆိုပေမယ့် သင့်ရဲ့စားသုံးသူကသာ သင့်ထုတ်ကုန်ကို စိတ်တိုင်းကျလို့ တလကို ၂ ခေါက်လောက်ပဲ ပုံမှန်ဝယ်သွားမယ်ဆိုရင် ဒါဟာ သင့်အနေနဲ့ ရကိုရရမယ့် အကျိုးအမြတ်တရပ်ဖြစ်ပါတယ်။ ဒီလိုသစ္စာရှိရှိဝယ်ယူလာချင်အောင် ကွာလတီပိုင်း၊ ဝန်ဆောင်မှုပိုင်း၊ မားကတ်တင်းပိုင်းအရ အစွမ်းကုန် လုပ်ပေးရမှာကတော့ သင့်တာဝန်ပါ။

အဲဒီလို သင့်ဖောက်သည်က သင့်ကုန်ပစ္စည်း (သို့မဟုတ်) ဝန်ဆောင်မှုကို စိတ်တိုင်းကျသွားတဲ့အခါ နောက်ထပ် သင့်ဆီကနေ သစ္စာရှိရှိ အားပေးမယ့် ဖောက်သည်(၂)ယောက်လောက်ကို ထပ်ပြီး ညွှန်းပေးပါလိမ့်မယ်။ အဲဒီအခါ သစ္စာရှိတဲ့ ဖောက်သည်တယောက်ကို အကြောင်းပြုပြီး နောက်ထပ် ပုံမှန်အားပေးမယ့်ဖောက်သည် (၂)ယောက်ထပ်တိုးလာတဲ့အတွက် (၃)နှစ်တာအတွင်းမှာ သင်နောက်ထပ်ရရှိလာမယ့် ဝင်ငွေကတော့ ၃၆၀,၀၀၀ × ၂ = ၇၂၀,၀၀၀ ကျပ် ဖြစ်ပါတယ်။ ဒီလိုနည်းနဲ့ သင့်လုပ်ငန်းကို အားပေးမယ့် စားသုံးသူကို ဆပွားတိုးသွားအောင် လုပ်လို့ရပါတယ်။

ဒီလို သစ္စာရှိတဲ့ ပုံမှန်ဖောက်သည်တယောက်ဟာ သူလိုမျိုး နောက်ထပ်အလားတူ ဖောက်သည်(၂)ယောက်ကို ရှာပေးနိုင်တယ်ဆိုပါစို့။

သူကိုယ်တိုင်ဆီကနေ (၃)နှစ်အတွင်း သင်ရရမယ့် အသားတင်အမြတ်ဟာ ၁၄၄,၀၀၀ ကျပ် ဖြစ်ပါတယ်။ သူညွှန်းပေးလိုက်တဲ့ ပုံမှန်ဖောက်သည်(၂)ယောက်ဆီကနေ (၃)နှစ်အတွက် ရရမယ့် အသားတင်အမြတ်ဟာ ၁၄၄,၀၀၀ × ၂ = ၂၈၈,၀၀၀ ကျပ်ဖြစ်ပါတယ်။ ဒါကြောင့် သစ္စာရှိတဲ့ စားသုံးသူတယောက်ကို အကြောင်းပြုပြီး (၃)နှစ်အတွင်းမှာ သင်ဟာ အသားတင်အမြတ်ငွေ ( ၃ ယောက်စာ) ၄၃၂,၀၀၀ ကျပ် ရရှိတော့မှာ ဖြစ်ပါတယ်။

ဒီတော့ (၃)နှစ်လောက်အတွင်းမှာ သင့်အတွက် အမြတ်ချည်း (၄)သိန်းလောက် ပေးမယ့် ဖောက်သည်အသစ်တယောက်ရလာဖို့ အစပိုင်းမှာ သုံးလေးသောင်းဖိုးလောက် ဒစ်စကောင့် ပေးသင့် မပေးသင့်၊ ကြော်ငြာခကိုလည်း တယောက်ချင်းစီအတွက် သောင်းဂဏန်းလောက် သုံးသင့်-မသုံးသင့် စဉ်းစားရမှာ ဖြစ်ပါတယ်။ ထောင်မြင်လို့ ရာစွန့်တဲ့ သဘောပါပဲ။ ဉာဏ်ရှိသလို သုံးဖို့ပါ။

 

BusyBook